၂၀၂၅ ခုနှစ် ဖေဖော်ဝါရီလ ထိတွေ့တိုက်ပွဲအခြေအနေ သုံးသပ်ချက်

၂၀၂၅ ခုနှစ်၊ ဖေဖော်ဝါရီလအတွင်း စစ်ကိုင်းတိုင်းဒေသတွင် စစ်ကောင်စီတပ်နှင့် ဒေသခံကာကွယ်ရေးအဖွဲ့များ (PDF/LPDF) တို့ကြား ထိတွေ့တိုက်ပွဲများ ပြင်းထန်စွာဖြစ်ပွားခဲ့သည်။ အထူးသဖြင့် ကနီ၊ အရာတော်၊ ရေဦး၊ မုံရွာ၊ မြောင်၊ ဘုတလင်၊ ဆားတောင်၊ ရွှေဘို စသည့် မြို့နယ်များတွင် ထိတွေ့တိုက်ပွဲများ အထူးပြင်းထန်ခဲ့သည်။

စစ်တပ်၏ အကြမ်းဖက်မှုများအဖြစ် ဘုတလင်မြို့နှင့် ဆားတောင်မြို့တွင် လူသတ်မှု၊ တပ်စွဲခြင်း၊ ကျေးရွာမီးရှို့ခြင်းများကို ကျူးလွန်ခဲ့သည်။ အရာတော်မြို့နယ် ငွေတွင်းရွာ၊ ရေဦးမြို့နယ် အောင်သုခကျေးရွာ စသည့်ဒေသများတွင်လည်း စစ်ကောင်စီမှ အကြမ်းဖက်မှုများ ပြုလုပ်ခဲ့သည်။

မုံရွာမြို့နယ်အတွင်း ဝမ်ပေါင်ကုမ္ပဏီနှင့်ပတ်သက်၍ ကြေးနီသယ်ယူရေးအတွက် စစ်တပ်၏ ကာကွယ်မှု့လုပ်ငန်းများကြောင့် ထိတွေ့တိုက်ပွဲများ မကြာခဏ ဖြစ်ပွားခဲ့သည်။ ထို့အပြင် ရွှေဘိုမြို့နယ် ဥသျှစ်ကန်ကျေးရွာသုသာန်အနီး ဒေသခံကာကွယ်ရေးအဖွဲ့ (PDF) နှင့် စစ်ကောင်စီတပ်တို့ အပြန်အလှန်တိုက်ခိုက်မှုများအတွင်း ထိတွေ့မှုများ အထူးပေါ်ပေါက်ခဲ့သည်။

စုစုပေါင်းအဖြစ် ၆၇ ကြိမ်ဖြစ်ပွားခဲ့သော ထိတွေ့တိုက်ပွဲများသည် ဒေသအတွင်း လုံခြုံရေးအခြေအနေကို စိုးရိမ်စရာကောင်းလောက်အောင် ပြင်းထန်စေခဲ့ပြီး၊ ပြည်သူ့ဘေးကင်းလုံခြုံမှုကို အလွန်ဆိုးရွားစွာ ထိခိုက်ပျက်စီးစေခဲ့သည်။ စစ်အုပ်စု၏ တိုက်ခိုက်မှုများသည် လူ့အခွင့်အရေးချိုးဖောက်မှုများအဖြစ် တင်ပြနိုင်ပြီး ဒေသခံပြည်သူများအတွက် စစ်ဘေးဒဏ်ကို ပိုမိုပြင်းထန်စေခဲ့သည်ဟု သုံးသပ်နိုင်ပါသည်။ထိတွေ့တိုက်ပွဲဖြစ်စဉ်များကို အောက်ပါအတိုင်းဇယားတွင်ဖော်ပြထားပါသည်။

ဖေဖော်ဝါရီလတိုက်ပွဲများသည် ထူးထူးခြားခြားမရှိခဲ့သော်လည်း တိုင်းမြို့မုံရွာမြို့ပေါ်နှင့် မိုင်အနည်းငယ်သာ ကွာသည့် ဗောဓိတထောင် တာဝါတိုင်စခန်းကုန်းကို ဒေသခံကာကွယ်ရေးတပ်များစုပေါင်းသိမ်းယူနိုင်ခဲ့ခြင်းမှာမူ ထူးခြားချက်တရပ်အနေဖြင့်တွေ့ရှိရပါသည်။

၂၀၂၅ ခုနှစ် မတ်လ စစ်ရေးအခြေအနေ သုံးသပ်ချက်

၂၀၂၅ ခုနှစ် မတ်လအတွင်း စစ်ကိုင်းတိုင်းနှင့် တိုင်းနယ်မြေတချို့၌ စစ်ကောင်စီ၏ အကြမ်းဖက်လှုပ်ရှားမှုများ၊ စစ်ဆင်ရေးများနှင့် ဒေသခံကာကွယ်ရေးတပ်ဖွဲ့များနှင့် တိုက်ပွဲများ များပြားစွာဖြစ်ပွားခဲ့သည်။အထူးသဖြင့် မတ်လအတွင်း စစ်ကောင်စီအဖွဲ့များကလေကြောင်းဖြင့် လာရောက်ပစ်ခတ်ခြင်းများ၊ စစ်အင်အားဖြင့် တပ်စွဲခြင်းများ၊ ဒေသခံကျေးရွာများသို့ ထိုးစစ်ဆင်ခြင်းများ၊ အင်အားဖြည့်ခြင်း၊ ရဟတ်ယာဉ်ဖြင့် ပစ္စည်းတင်သယ်ခြင်းများစသည့် လှုပ်ရှားမှုများကို အထင်ကရမြို့နယ်များဖြစ်သော ကနီ၊ ချောင်းဦး၊ ရေဦး၊ မြောင်၊ ဆားလင်းကြီး၊ မုံရွာ၊ ကလေး၊ ထီးချိုင့်၊ ရွှေဘို စသည့်ဒေသများတွင် လုပ်ဆောင်ခဲ့သည်။

မြောင်၊ ရွှေဘိုနှင့် ချောင်းဦးမြို့နယ်များတွင် စစ်အုပ်စုများ အဆက်မပြတ်လှုပ်ရှားနေပြီး၊ တပ်စွဲခြင်း၊ ရွာဝင်ခြင်းများဖြစ်ပွားနေသည်။ပါရာမော်တာဖြင့် လာရောက်ပစ်ခတ်ခြင်းများစွာကိုမြင်တွေ့ရပြီး၊ ဒေသခံ ပြည်သူများအတွက် အန္တရာယ်များပိုမိုတိုးပွားလာသည်။မတ်လအတွင်း စစ်ကောင်စီလက်အောက်ခံ တပ်ဖွဲ့များနှင့် ဒေသခံကာကွယ်ရေးအဖွဲ့များအကြား တိုက်ခိုက်မှုများ ပိုမိုဖြစ်ပွားလာသည်။ဤအခြေအနေများ အရ စစ်ကောင်စီ၏ စစ်ဆင်ရေး တိုးချဲ့မှုနှင့် အကြမ်းဖက်မှုများသည် ဒေသတွင်း ဘေးကင်းလုံခြုံမှုကို ထိခိုက်စေနိုင်ကြောင်း သုံးသပ်နိုင်ပါသည်။ မတ်လအတွင်းစစ်ရေးဖြစ်စဉ်များကို အောက်ပါဇယားတွင် ဖော်ပြထားသည်။

အထက်ဇယားပါ ထိတွေ့တိုက်ပွဲများအနက် ထူးခြားသော ဖြစ်စဉ်များကို ထုတ်နုတ်ဖော်ပြပါမည်။

၁။ မုံရွာ မန္တလေးလမ်းပေါ်က တိုက်ပွဲ

ချောင်းဦးမြို့နယ်၊ မုံရွာ – မန္တလေး ကားလမ်းမှာ မတ်လ ၄ရက်က စစ်အုပ်စုရဲ့ သံပြားကာ ကားနှစ်စီးကို တိုက်ခိုက်ခဲ့ရာမှာ ဒု-ဗိုလ်အဆင့် အပါအဝင် စစ်အုပ်စု ၁၇ ယောက်ကို သုတ်သင်ရှင်းလင်းနိုင်ခဲ့ပြီး ကားနှစ်စီးနဲ့ လက်နက်ခဲယမ်းတွေ သိမ်းဆည်း ရရှိကြောင်း ချောင်းဦးမြို့နယ် ပကဖ တိုက်ခိုက်ရေးတပ် CHU PDF ၏သတင်းထုတ်ပြန်ချက်အရသိရသည်။ အဆိုပါတိုက်ပွဲသို့ စစ်ကူလာသော စစ်တပ်သည် အရပ်သားခရီး သည်တင်ကားတစီးကို အတင်းဓမ္မလူသားဒိုင်းလုပ်ကာ ချီတက်ခဲ့သောကြောင့် တိုက်ပွဲတွင် အရပ်သားပြည်သူအချို့ ထိခိုက်သေဆုံးမှုများလည်းရှိခဲ့သည်။ စစ်ကောင်စီပြန်လည်ကြီးစိုးထားသော မုံရွာ/မန္တလေးလမ်းပေါ်တွင် ယခုကဲ့သို့ ကြားဖြတ်တိုက်ပွဲများ ပြန်လည်ပေါ်ပေါက်လာခြင်းသည် ၂၀၂၅ နှစ်ဦး၏ ထူးခြားမှုတရပ်အဖြစ် သုံးသပ်မိပါသည်။

၂။ ကလေးဂန့်ဂေါလမ်းပေါ်က ကျေးရွာသိမ်းတိုက်ပွဲများ

ကလေးဂန့်ဂေါလမ်း ကလေးမြို့နယ်တောင်ပိုင်းရှိ စစ်ကောင်စီတပ်စွဲထားသော ပျူစောထီးကျေးရွာများကို ပူးပေါင်းအဖွဲ့များက မတ်လ(၆) ရက်နေ့မှစတင်တိုက်ခိုက်ခဲ့ပြီး စခန်းသိမ်းတိုက်ပွဲများအထိ ဆက်လက်ဆင်နွှဲလျက်ရှိကြောင်းတွေ့ရသည်။ အဆိုပါစခန်းသိမ်းတိုက်ပွဲများတွင် စစ်ကောင်စီဘက်မှ လေကြောင်းဖြင့် စစ်ကူပေးခြင်း၊ လက်နက်ကြီးပစ်ကူပေးခြင်းများရှိနေပြီး အရပ်သားထိခိုက်သေဆုံးမှု များလည်းရှိနေသည်။ ကလေးဂန့်ဂေါလမ်းတလျှောက်ရှိ ပျူစောထီးကျေးရွာအချို့တွင် စစ်တပ်က တပ်စွဲထားပြီး လမ်းပိုင်းကို ထိန်းချုပ်ရန်ကြိုးစားလျက်ရှိရာ အဆိုပါကျေးရွာများကို သိမ်းပိုက်ပြီး တော်လှန်ရေးတပ်များက လမ်းပိုင်းကို ထိန်းချုပ်နိုင်ရန် ကြိုးပမ်းလျက်ရှိသည်။

ဖေဖော်ဝါရီလနှင့် မတ်လ စစ်ရေးဖြစ်စဉ်များကို လေ့လာကြည့်ပါက မြို့သိမ်းတိုက်ပွဲများ အရှိန်တန့်နေပြီး စခန်းသိမ်းတိုက်ပွဲအချို့နှင့် ရန်သူ့စစ်ကြောင်းကို ထိထိရောက်ရောက်ကြားဖြတ်တိုက်ခိုက်နိုင်မှုများသာ တွေ့ရသည်။ ယခင်လများထက် ထိတွေ့တိုက်ပွဲများပိုမိုများပြားခဲ့သော်လည်း စစ်ဆင်ရေးကြီးများ မစတင်နိုင်သေးသည်ကို တွေ့ရသည်။